17 - 7 - 2010

Dit voel asof die koue net nie wil weggaan nie maar dit beteken net dat ons nie kan wag om weer weg te spring in ons tuine nie. Die van julle wat nou al wil begin werk aan 'n pragtige lente tuin kan nou maar hulle Lelie bolle gaan koop en begin plant.  Onthou lelies hou van 'n halfdag son area maar van baie los grond. Jy kan maklik ongeveer 'n 10cm laag kompos inwerk. Beenmeel of superfosfaat is ook baie belangrik, maar onthou dat die bol se meeste krag sit in die bol, so dis belangrik dat jy die bol tot aan die einde van die groeiseisoen voer om te verseker dat die krag weer terug in die bol gesit word vir volgende jaar.

Geweldig baie mense stuur vir my e-posse en vra oor wanneer hulle weer kan begin plant en wanneer hulle kan begin terug sny. Dis belangrik om nie te oorhaastig te wees nie. Wag eers vir die koue nog te minste twee weke. Selfs die blare wat seergekry het en begin afval kan jy maar net daar los. Jy hoef dit nie weg te vat nie want daai blare vorm 'n kombersie op die plante se wortels. Onthou net om jou plante nog steeds deur die winter nat te gooi. As jy dit nie nat gaan hou nie gaan die koue skade net groter word. Jy moet goed natgooi maar nie plasse water laat staan nie. Maak seker jy gooi in die oggende nat.

Dit is wel nou die regte tyd om jou rose, vrugte bome en Krismis rose terug te sny. Ek weet ons praat altyd van die rose en vrugte bome, maar nou vra almal my hoe vêr moet hule die Krismis rose/Hortensias en Fuchsias terug sny.  Krismis rose moet ongeveer 20 – 30cm of soos hulle in die ou taal sal sê, 'n voet van die grond af gesny word. Die Fuchsias moet ongeveer 60% teruggesny word. Met hierdie plante hoef 'n mens ook nie te kyk vir ogies nie, jy kan maar net die volume afsny en die plant skoonmaak. Dis baie belangrik om die grond om die plante los te maak en hulle met 'n lekker dik laag suurkompos te behandel. Hier kan jy sommer ongeveer 5 – 10cm se suur kompos neergooi.